El sog‘ligi — yurt boyligi

Stomatitni uy sharoitida bartaraf qilish usullari

Stomatit – og‘iz bo‘shlig‘i shilliq qavatining yallig‘lanishi, ya’ni og‘iz yelikishi ham deyiladi. Bu xastalik mustaqil kasallik holida kechishi ham, boshqa dardlarning(qizamiq, qizilcha, gripp, kandidoz) belgisi ham bo‘lishi ham mumkin.

U moddalar almashinuvi kasalliklari (avitaminoz – vitaminlar yetishmovchiligi, qandli diabet) asab va ichki a’zolar kasalliklari, vitamin yetishmovchiligi, ichki sekresiya bezlari faoliyatining buzilishi oqibatida paydo bo‘ladi. Chekish, spirtli ichimliklarga ruju qo‘yish, juda issiq yoki sovuq, nordon, sho‘r ovqatlar yeyish ham stomatitga sabab bo‘lishi mumkin. Ayrim dorilarga nisbatan sezuvchanlik ortganda xususan, pala-partish antibiotiklarni ichib o‘z-o‘zini davolaganda, balog‘atga yetish davrida, aql tishi chiqishi qiyinlashganda ham stomatit ro‘y beradi.

Ushbu kasallikning shakli har xil bo‘lishiga qaramay ularning umumiy o‘xshash belgisi bor. Ya’ni, bu xastalikda og‘iz bo‘shlig‘i shilliq qavati qizaradi. Uning atrofidagi to‘qimalar shishadi, jag‘ osti limfa tugunlari kattalashadi. Xastalik o‘tkir va surunkali kechadi.

Stomatitning kataral, yarali nekrotik, aftoz xillari farqlanadi. Ayrim dori moddalarining yoqmasligi oqibatida, kimyoviy moddalar ta’sirida medikamentoz stomatit, og‘iz bo‘shlig‘i shilliq qavatining o‘tkir kechuvchi, kasallangan tishlar yoki tish protezidan jarohatlanish natijasida travmatik stomatit paydo bo‘ladi. Travmatik stomatitning Bednar aftasi (chaqaloqlar aftasi) shakli go‘daklarda kuzatiladi. Stomatitning oldini olish uchun og‘rigan tishlarni va organizmning umumiy kasalliklarini o‘z vaqtida davolash, shilliq qavatning yallig‘lanishiga sababchi bo‘ladigan omillarni bartaraf etish zarur.

Quyida stomatitning tuzalishiga yordam beradigan uy sharoitidagi ba’zi usullar bilan tanishishingiz mumkin.

Choy xaltachalari

Qora choy biriktiradigan teri oshlovchi moddalarga ega, ular yaralarga tinchlantiruvchi ta’sir o‘tkazadi. Moychechakli choy ham yarali hududni og‘riqsizlantirishga yordam beradi. Buning uchun choy xaltachasini ho‘llab, uni 10 daqiqaga yaraga qo‘yib turing.

Asal

Asal qadimdan o‘zining bakteriya va zamburug‘larga qarshi xususiyatlari bilan mashhur. Asalning davolovchi xususiyatlari shunchalik ko‘pki, ushbu shirinlikning ma’lum turlari yara va jarohatlarni davolashda ham qo‘llaniladi.

Aloe

Agar uyingizda tuvakda aloe o‘stirsangiz, uning bitta bargini kesib olib, sharbatini suvga qo‘shing va ushbu aralashma bilan og‘zingizni chaying. Bu o‘simlik tabiiy antibakterial va shamollashga qarshi vosita bo‘lib, u bilan og‘izni chayish orqali yarani tozalash va og‘riqni yo‘q qilish mumkin. Bundan tashqari, aloe B, C guruhidagi vitaminlar va aminokislotalarga boy.

Boshqa tish pastasidan foydalanib ko‘ring

Stomatit paydo bo‘lganida shifokorlar tish pastasini natriy laurilsulfati — ko‘pik hosil qiluvchi modda bo‘lmagan boshqasiga almashtirishni tavsiya etadi, aynan u yara yuzaga kelishiga sababchi bo‘lishi mumkin.

Tuzli eritma

Tuzli eritma bilan og‘izni chayish yara bitishi jarayonini tezlashtirishga yordam beradi. Tuz — yumshoq antiseptik vositadir.

Qatiq

Tirik mikroorganizmlarga ega qatiq stomatit paydo bo‘lishi oldini olishi mumkin.

Xulosa qilib aytganda “Kasallikni davolagandan ko‘ra uni oldini olgan yaxshi” deydi dono xalqimiz. Og‘iz bo‘shlig‘i kasalliklarining oldini olishda bemorlar nafaqat shaxsiy gigiyenaga jiddiy e’tibor berishlari zarur, balki shifokor-stomatolog ko‘rigidan tez-tez o‘tib, uning maslahatlariga ham amal qilishlari kerak.

[box type=»info» align=»aligncenter» ]Diqqat! Yuqorida keltirilgan yordamchi usullardan faqat kattalargina, qarshi ko‘rsatmalar mavjud bo‘lmagan hollardagina foydalanishlari mumkin!

Stomatit tez-tez paydo bo‘lsa shifokorga murojaat qiling![/box]

 

Bizni Telegram’da ham kuzatishingiz mumkin. Telegram’dagi kanallarimiz @AvitsennaUz hamda @DnkUz

loading...

Fikr bildirish

Sizning email ingiz hech kimga ko‘rsatilmaydi. To‘ldirish zarur bo‘lgan kataklar * bilan ajratilgan